كانت سياسة الجامعة مع الدفعات الدراسية تقسيم الدفعة إلى مجموعات
كل مجموعة فيها عشر طلبة جدولهم الدراسي موحد ، طالب أجنبي والبقية روس
كنت الطالب الوحيد في مجموعتي الدراسية وكان معي تسعة طالبات
أحدى الطلبات كانت روسية أذربيجانية يعني أصلها من جمهورية اذربيجان
كانت فتاة جميلة هادئة ومنطوية أسمها سبينا كانت لا تتكلم كثيرا ويبان عليها اثر الترف
كان كل بنات المجموعة لا يحبونها وكنت اتصور انها عادت الروس في العنصرية ولان البنت تبدو انها من اسرة مرتاحة ماديا
هكذا كنت اظن
قبل أن تقع الكارثة التي علمتها بنفسي
بدأت الكارثة في أخر اليوم الدراسي قبل عطلة نهاية الاسبوع
قامت سبينا واخبرت الجميع انها تعتزم الاحتفال بعيد ميلادها يوم السبت القادم وانها تدعو جميع المجموعة على الحفلة في بيتها.
يوم السبت قعدت من الصبح على غير العادة وقعدت صديقي وجاري بالسكن علي عشان يكوي لي البدلة لاني ما اعرف اكوي والبدلة الوحيدة النظيفة عندي مو مكوية
بعد ما صحصح بعد جهد جهيد واقناع مستفيض قرر انه يكوي البدلة وهو متغطي ومنسدح لان الدنيا برد
طبعا خلص عملية الكوي وهو منسدح طلعت البدلة مكوية ولكن مو مكوية مدري شلون جنك مقعد عليها فيل ، يعني كوي غريب عجيب
المهم علقت البدلة وانا مستانس ورحت للمترو ( الاندرجراوند ) عشان اشتري ورد من الانفاق بو ربع مال اللي يجمعونه من القبور ويبعونه المتشردين
شسويلها اذا عيد ميلادها اخر الشهر
المهم رحت واشتريت الورد وتوهقت بالهدية ، جلست افكر بحيرة شنو اشتري لها وانا طاقني السلك ، العادة اذا كان في عيد ميلاد لاحد افراد المجموعة الدراسية تقوم مسئولة المجموعة وتجمع قطية عشان الهدية اشوف الروس اليوم صهيونو على الموضوع وعطوها طناش
قررت اروح لعلي مره ثانيه ، علي هذا انا مسميه عيوز السكن ، كل شي تلقا عنده ، ويعمل حساب لكل شي ، يعني واهو جاي من الكويت يمر محلات ابو مية ويشتري اغراض وايد يعطيها هدايا لاعياد الميلاد، ونظرا لان الروس ما عندهم ابو ميه وكله اصلي يفرحون بالسوالف هذي عبالهم اصلي.
دخلت على علي وقلت له دبرني بهدية انا متوهق
قال من عرفتك وانت متوهق يا اخي انت تستلم اكثر راتب فينا دبر عمرك ... الخ
قلت شوف انت الحين صارلك ساعة تعطيني محاضرة وانا متحملها عشان تنقذني بهدية واذا ماكو هدية ، بسويك فرشة عند الباب اللي ينظفون فيها الجواتي
قال لاخلاص عندي ساعة ماركة (( لا تلبسني أنشلع )) بس رهيبه
قلت ورني وعطانيها طالعت فيها والا مصدية من الجوانب والعقرب يقدم خطوة ويرجع خطوتين
قلت علي هذي مستعملة ! قال لا مستعملة كالجديدة
قلت يعني أستعمال مدراء؟ قال اي استعملتها بنت ثلاث شهور بس ويوم انتهت العلاقة سحبت الساعة منها، قلت هذي سيارة مو ساعه علي يخرب بيتك انت يهودي؟ ساعة من ابو مية ومستعملة ثلاث شهور وراجع مغلفها؟
قال تبيها والا لا؟ قلت حكم الفلس اي ابيها امري لله
بعد ما ظمنت الورد مال الميت وساعة الميت الثاني علي والبدلة مكوية ارتحت نفسيا اني راح ادخل الحفلة براس مرفوووووووووووووع
خذت غفوة محارب قبل الاحتفال
ذهبت الى العنوان اللي كتبته لي سبينا في ورقة ( عنوان بيتهم)
يوم وصلت الشارع انصدمت انها كاتبة بس عنوان العمارة مو كاتبة الشقة
قلت الله يقطع ابليسها الحين شلون بحصل شقتهم يلله بسأل بالعمارة يمكن يدلوني
المهم وصلت العمارة انصدمت انها العمارة الوحيدة المصبوغة ونظيفة
والصدمة الثانية الباب مسكر وعليه حماية (حراسة)
جيت وانا خايف قلت لا يكون مركز مخابرات والا سفارة واروح بخرايطها
قلت لو سمحت قال نعم قلت وين شقة سبينا بالعمارة قال منو انت
قلت زميل دراسة قال لحظه وكلم بالجهاز بيده قال دش
قلت اي شقة قال العمارة كلها بيتهم دش في ناس راح تستقبلك
وانفتح الباب وناداني واحد اشوف بس بطنه ما اشوف اخره
الحين عرفت ليش البناااااات يكرهونها طلعت بنت احد اكبر رجال المافيا في روسيا
انا وين طحت وعيال الذين المجموعة محد حذرني واكيد محد جاي
دخلت وواحد يمشي قدامي وواحد وراي وانا الطم بالنص
الله لا يوفق اللقافة
..... يتبع الحلقة القادمة
07-01-2008, 01:16 PM
الحلقة الثامنة: مذكرات طالب كويتي في الخارج (يوم من عمري) 
