السلام عليكم


اليوم حبيت انشر لكم بعض المساجلات القصيره بيني وبين اصدقائي وبيني وبين عيال عمي وبيني وبين اخواني


وهي مجرد ابيات قصيره لانها عن طريق التلفون النقال (الجوال)

راح اكتب لكم هالابيات على طريقة الصوت والصدى وهي طريقه معروفه




اليكم البدايه واتمنى ان تحوز الابيات على اعجابكم

بيني وبين ولد عمي

الصوت (مع العلم ان هذا الشخص ليس هو صاحب هذه الابيات)

للهينه هين وللصعبه اكتاف
والشعر برق ٍ لاح يمك واخيله

يا مرحبا يا مالك الطيب باسلاف
ترحيبة المبطي بشوفة خليله

الخطوه اللي ابعدت رجلي اضعاف
ماتبعد الخاطر بشوفة عديله

ماقول فيك من الوفى عدة اوصاف
انت الوفا ينصاك فاتح شليله

عسا الولي يحميك من كل الاصداف
ويرزقك من خير ٍ يغطيك سيله



الصدى (وهو رد من تاليفي)

عندي مهارة شعر بالوزن والقاف
صخرتها لاجل القلوب العليله

قلبك يا فيصل لونه اليوم شفاف
يفارقه هم ٍ ويدخل بديله

وين الذي ياطا على كل ماشاف؟
وين الذي ما يعرف المستحيله؟

ياذيب انت الذيب منتا بخواف
وان ما غزانا الهم حنا نعنيله

واللي لجأ لله على كل الاصداف
بيريحه وهموم قلبه يزيله



.......

بيني وبين صاحبي اللي افتخر فيه دايما ابراهيم العنزي

الصوت (مع العلم ان هذا الشخص ليس هو صاحب هذه الابيات)

كل ذيب ٍ بين ربعه له قبول
والردي محد ٍ يحاول يقربه

من طلع فوق الجبل عاف النزول
والكفو علم المراجل تكسبه

وكل رجل ٍ له مرام وله ميول
وكل طير ٍ ينعرف من مخلبه

والجمل يصبر على ثقل الحمول
ياحزام ٍ للشدايد نسحبه



الصدى ( وهو رد من تاليفي)

الشعر مني يابن وايل يقول
ياهلا باللي براسي منصبه

يا كبير الشان يا ولد الاصول
يالسلاح اللي ليا ظقت اسحبه

العفن لعيال وايل ما يطول
والشهم دايم نحاول نكسبه

خوة الويلان كنز ٍ ما يزول
وانت الحبلان اكبر تجربه


.......................

بيني وبين ولد عمي

الصوت (مع العلم ان هذا الشخص ليس هو صاحب هذه الابيات)

مارسلت اغني في غرام الغنادير
ولارسلت اسلي خل فاقد نديمه

جيت ومعي صدق الولا والتعابير
احساس صادق والنوايا سليمه

عندي غلاكم فوق كل التصاوير
شيمة وقيمه واحترام وحشيمه


الصدى (وهو رد من تاليفي)

يامرحبا اعداد ما رفرف الطير
تاصل مناف اللي صفاته كريمه

يابن الذي بالطيب ماله مخاشير
قوي باس ولا يخلي غريمه

اطلب من اللي في يديه المقادير
تبقى الرسايل بيننا مستديمه


.............

بيني وبين صاحبي ابراهيم العنزي

الصوت (مع العلم ان هذا الشخص ليس هو صاحب هذه الابيات)

ما يرتكي للمعضلات وينقل الحمل الثقيل
الا ثقيل ٍ حافظ ٍ قدر اللحا واشنابها

متراكي ٍ بين الجبال اللي لها ظل ٍ ظليل
النايفات الشامخات الراسيات هضابها

قد المكانه قدها وقدود يالسيف الصقيل
شبيت نار المرجله والنار من شبابها


الصدى (وهو رد من تاليفي )


هلا هلابك يا هلا ياراعي المد الجزيل
لا يا حليفي يا ولد وايل ياخير اشنابها

يالذيب يا القرناس يالنوماس يالخل الاصيل
يالطود يالفزاع لقراب العرب واجنابها

انت الذي ماتعرف الاعجاز او المستحيل
واغليك كثر حروف شعري وكثر من يقرا بها


.................


بيني وبين ولد عمي

الصوت (مع العلم ان هذا الشخص ليس هو صاحب هذه الابيات)

بالليل يطري من نحبه على البال
واعرف تراك الحين عالبال طاري

الصدى(وهو رد من تاليفي)

يمال فرقا العين كان اللقا طال
اناشهد ان البعد ماهو اختياري

واناشهد ان فرقا الاجوايد سلاّل
والله يصبرني لطول انتظاري

................

بيني وبين صاحبي احمد العنزي


الصوت (وهو ثلاث ابيات من تاليفي)

الذيب يوم انه شكا جور الزمن قام يعوي
يوم ان محد ٍ جاوبه حس بندم في داخله

مير البلا مالي بهالديره رفيق ولا خوي
ولا الذيابه ماهي بفزعاتها متثاقله

شرواك يا ذيب ٍ ليا من ثار يسمعله دوي
من لابة الويلان راعين العلوم الطايله

الصدى (وهو رد من تاليف احمد العنزي)

العوي بس للذيابه كيف مارد العوي
جيتك وشايل هقاوي بالحشا لك هايله

ليتني اقدر اكسر حاجز البر القوي
وانثر بقلبك مشاعر في خفوقي شايله

دام هالدنيا تبعد من نحب ونهتوي
هذي الدنيا غريبه في زوال ٍ زايله

لكن ورب الخلايق مانسيتك يا خوي
والظلمه اللي بيننا يالله عساها قايله

وانت يا ذيب النشاما ساكن بقلب بدوي
لو يميل الكون كله بس عقلنا مايله

................

بيني وبين صاحبي عمر العازمي

الصوت (مع العلم ان هذا الشخص ليس هو صاحب هذه الابيات)

واللي يسوق الغيم في حزة عصير
طاحت مخاييله على القاع حدرا

اني لكم وافي مثل سالم الزير
بس الزمن قاسي والايام غبرا

يجري غلام في وريدي كما البير
يسقي نبات القاع وتصير خضرا

باقي لكم باقي على الشر والخير
حافظ غلاكم والله بحالي ادرا

وان بان مني يا معازيب تقصير
عذري رسالة ليل في جو قمرا


الصدى( وهو رد من تاليفي)

ما منك يا نسل العطا اي تقصير
وانا خويك من سنين ٍ ودهرا

جعل الولي يرسل لكم بارق الخير
وجعله يحول عسر الايام يسرا

بالمرجله عنتر وبالخوه الزير
هذي صفاتك لا غدينا بصحرا

انت الوحش اللي اذا عزم يطير
برق الجناح تناظره وتتعرا

وابشر بفزعتنا بوجه المقادير
العمر فاني والمقادير قشرا


............

هذي بيني وبين اخوي الكبير

مع العلم ان اخوي شاعر يفوق الوصف بقصايده بس هو مبتعد عن الاعلام

الصوت (من تاليف اخوي)

جعل مزن ٍ تجمع فيه نوّه
يسيّل درب عصمان الهقاوي

يزين الدرب ويزيّنه جوّه
يعاونهم على التوفيق قاوي

يابو مرهون تو الوقت توّه
تقدم وانت واثق بالخطاوي

وانا خابرك كالحر المفوّه
تحوم لصيدتك حوم النداوي

واذا صادفك في دنياك لوّه
تطوعها على ما كنت ناوي


الصدى (وهو رد من تاليفي)

جعل ليل ٍ يشعشع فيه ظوّه
ينور درب من يمسي خلاوي

اذا من خلقتي فيني مروّه
اخذته منك يا القرم الطناوي

ذيابه بيننا فزعه وخوّه
واذا صدنا قسمنا بالتساوي

وانا ما احتاج منك اي تنوّه
عساني ما اخيبك الهقاوي

يابو محمد ليالينا تتوّه
عسالله يجنبك شر البلاوي




والسلام مسك الختام

صاحب السعاده<<< صح السانك ملااااايين

بأمانه عاجزه عن الوصف ، مدري شكتب
والله مو مجامله ، أقرأ وأتعجب ماشاء الله عليك

مبدع بكل ماتعنيه الكلمه
سجلني من ضمن جمهورك وتلاميذك ومتابعين شعرك

صح السانك مره ثانيه

صح بدنج يا فرفوشه ويعطيج العافيه على هالكلام


وانا اتشرف انج تكونين احد المتابعين لابياتي وقصائدي


واذا كنتي تكتبين شعر لا تبخلين علينا

تسلم اخوي وصح لسانك وبصراحة عجبتني

تسلم تسلم تسلم

والله يقويك

تصدق اخوي صاحب ان بعض الاوقات احسد الشعراء لانهم يقدرون يعبرون عن اللي بداخلهم

الله يوفقك ونشوفك في المحافل الاعلامية ان شاء الله

تسلم يا وحشتني وما قصرت والله يوفق الجميع

اشكرك جزيل الشكر على المرور

ماشاء الله شعراء

انت الذي ماتعرف الاعجاز او المستحيل
واغليك كثر حروف شعري وكثر من يقرا بها

صح لسانك

صح بدنك يا ابو فهيد


تسلم على مرورك وما قصرت

شكرا صاحب السعاده

صح لسانكـ ...

مساجلات جميلهـ ..

العفو يا فارس وشاكرلك عالمرور




صح بدنج يا نايس غيرل ومرورج الاجمل

صح اللسانك اخوي صاحب الساعده

و جميل جدا انرى ابداعاتك

رااائع بشااعريتك اخي

و اتمنى ان ترينا الجديد لديك

دائما


^_^

صح لسانج يا نفيشه (اتمنى ماقلت الاسم غلط)


ويسلموووو على مرورج