السلام عليكم
هذي احدى قصائدي تقريبا صارلي سنه من كتبتها
قصيده غزليه واتمنى انها تحوز على رضائكم
الصاع صاعين
فديت زول اللي ذبحني بزوله
انا اشهد ان زوله ولا زول دارين
اذا مشا كنه يطير بسهوله
احس خطواته عن الارض شبرين
واذا تبسم يبهر الناس حوله
كل البنات تصير جمبه مساكين
صغير في عمره ويازين طوله
لايق عليه الغنج من عشرة سنين
العين حورا والشفاة معسوله
والخد ورده ماتجي بالبساتين
طويل عنقه والخصر به ميوله
الله يحفظه من عيون الحسودين
في بنوك لندن عنده اكبر سيوله
وعنده عقارات بفرنسا وبرلين
تقصد به الشعار منذ الطفوله
وانا احاول الحق الدور الحين
سمَعته ابياتي ولا هو بـ حوله
يقول وشعندك ؟؟ تبي اعطيك فلسين ؟؟
انا انصدمت بواقع اللي يقوله
من عذرها مغرورةٍ بالملايين
قلت:اسمعي يا صايعه يا مهبوله
هذا كلامي وافهمي مقصدي زين
انا محصل بالمراجل بطوله
وعندي من الاملاك ما يترس العين
ماني من اللي يطمعون بعموله
نفسي عزيزه واعرفي من تحاجين
قالت:انا عندي كلام وبقوله
ياريت تسمعني ولا تقول بعدين
كلامك اخجلني وانا مو خجوله
وابيك تعذرني على ردي الشين
وابيك بعقالك تزيد الميوله
وابيك تقبل صحبتي يا اريش العين
بالنسبه للصحبه انا ارفض قبوله
وبالنسبه للاعذار بعدين بعدين
وبالنسبه لعقالي تراهي محلوله
عناد فيج ابي اعدله من الحين
مشيت انا وخليتها في ذهوله
رديت انا في مشيتي الصاع صاعين
21-02-2008, 06:31 PM
قصيدة لي واتمنى ان تعجبكم 
